Kjøt av villsau frå Værlandet er no på
plass på festivalen Salone del Gusto i Italia, kor villsaubønder frå Austevoll
står for salet. Det gjer dei i selskap med over 2000 tradisjonsprodukt frå
heile verda.
- Det er ganske unikt at vi har fått
ferskt kjøt sendt frå Noreg og hit til Italia, seier matataché hos Fylkesmannen
i Hordaland, Gunnar Nagel Dahl.
- Kvaliteten er fantastisk, og vi gler oss
til å sleppe kjøtet laust og sjå korleis det vert teke i mot.
Ein skulle gjerne tru ein marknad i
gourmetlandet Italia fløymde over av sauekjøt, men det er ikkje tilfelle. Her
er mjølkesau normen, og kjøt av dyret er sjelden. Det er difor å forvente at
dei 300 kiloa som vart slakta på Nortura i Førde mellom 6. og 8. september får
bein å gå på.
- Kjøtet er steikt på svak varme over lang
tid, og er utruleg mørt, fortel Monica Hauge, villsaubonde frå Austevoll og
utdanna kokk.
Kjøtet vert servert med kål og dressing.
Får italienarane smaken på norsk villsau, har dei høve til å kjøpe med seg
ferskt kjøt heim til sitt eige kjøkken.
Salone del Gusto er arrangert av den
verdsomspennande rørsla Slow Food, som jobbar for å ta vare på og støtte ein
mest mogleg mangfaldig matproduksjon. Messa og festivalen er deira viktigaste
internasjonale hending, dedikert til mat og gastronomi. Over 1600 produsenter
frå heile verda deltek på marknaden, og opp mot 250 000 er venta å vitja
arrangementet.
Grunnleggjaren av Slow Food, Carlo
Petrini, besøkte Noreg i 2006. Då fekk han prøve villsaukjøt, og det fall i
smak: Gourmeten sa rett og slett at villsau var det beste han har smakt.
Norsk villsau har presidiumstatus i Slow
Foods Smakens ark - eit levande bibliotek av tradisjonsmat frå heile verda.
Presidier har ein heilt særskilt status i Smakens ark - produkt med særleg
sterk regional og historisk tilknytning. Produksjonen skal òg vere
handverksprega.
På 1950-talet var villsauen nærast utrydda
- men ein storstila redningsaksjon vart sett i gong nettopp frå Austevoll, leia
av Lars Erling Horgen ved Austevoll landbrukskontor. No er interessa for den
hardføre og sjølvstendige sauen sterkt aukande langs heile Noregskysten, og
rasen er ikkje lenger truga. Men det er framleis ei utfordring å få det
spesielle kjøtet ut til forbrukarar.
Siri Helle
Red. anm: Grunna at nettredaktøren var på reise i helga, vart ikkje saka publisert når saka var heilt fersk.
Kommentarer
Legg inn en kommentar